Акционерлермен және инвесторлармен өзара іс-қимыл

Акционерлік капиталдың құрылымы

Есепті кезеңде акционерлердің құрылымында өзгерістер болған жоқ.

Функцияларын заңнамаға және Компанияның Жарғысына сәйкес Қор Басқармасы орындайтын Акционерлердің жылдық жалпы жиналысында мынадай құжаттар бекітіледі деп күтілуде:

• ҚМГ-ның 2021 жылға арналған жылдық қаржы есептілігі (шоғырландырылған және жеке);
• ҚМГ-ның 2021 жылға арналған таза кірісін бөлу тәртібі;
• ҚМГ-ның бір жай акциясына шаққандағы дивиденд мөлшері.

Дивиденд

«Самұрық-Қазына» АҚ Басқармасының 2021 жылғы 26 тамыздағы шешімімен (№36/21 хаттама) «Самұрық-Қазына» АҚ-ның еншілес ұйымдарға қатысты жаңа дивидендтік саясат бекітілді.

Дивидендтік саясаттың мақсаты Қор мен Компания мүдделерінің балансын, дивиденд мөлшерін, оларды төлеу шарттары мен тәртібін белгілеу кезіндегі тәсілдің болжамдылығы мен ашықтығын қамтамасыз ету болып табылады.

Компанияларға қатысты төленетін дивиденд мөлшері олардың жетілу дәрежесіне және қаржы орнықтылығы көрсеткіштерінің негізінде айқындалатын қаржы-экономикалық жай-күйіне қарай сараланып айқындалады.

1. Еркін ақша ағыны (FCF) - ағымдағы қызметті қолдау үшін инвестициялық шығыстарды шегергеннен кейін бірлескен кәсіпорындардың дивидендтерін қоса алғанда, шоғырландырылған операциялық ақша ағыны.
2. Компания Қордың Инвестициялық-стратегиялық комитеті мен Қордың Директорлар кеңесі мақұлдаған Компания инвестицияларының мөлшеріне төленетін дивиденд мөлшерін азайтуға құқылы.

Дивиденд төлеу туралы шешім қабылданған кезде дивиденд Акционерлердің жалпы жиналысы белгілеген мерзімде төленеді.

«ҚазМұнайГаз» АҚ-ның еншілес ұйымдарға қатысты дивидендтік саясаты Компанияның сайтында берілген.

«ҚазМұнайГаз» ұлттық компаниясы» акционерлік қоғамының Жарғысы Компанияның сайтында берілген.

Толық ақпарат «Қаржы есептілігі» бөлімінде берілген.

Кредиттік рейтингтер

Халықаралық рейтингтік агенттіктердің кредиттік рейтингтері ҚМГ компаниялары тобының кредиттік қабілеттілігін сенімді және тәуелсіз бағалау болып табылады. Компания инвестициялық деңгейге жақын және одан жоғары ұзақ мерзімді кредиттік рейтингті қамтамасыз ету үшін деңгейлердегі негізгі қаржылық көрсеткіштерді қолдауға ниетті. ҚМГ рейтингтік агенттіктерге ҚМГ компаниялары тобының кредит қабілеттілігін жан-жақты және дұрыс бағалау үшін қажетті барлық ақпаратқа қол жеткізуге мүмкіндік береді. ҚМГ Басқармасы мен рейтингтік агенттіктер арасында мерзімді шолу кездесулері өткізіледі және ҚМГ олармен тұрақты байланысты қолдауды жалғастыруда.

Компанияның өндірістік және қаржылық көрсеткіштері мен нарық динамикасынан басқа, ҚМГ кредиттік рейтингтері Қазақстанның тәуелсіз кредиттік рейтингтерімен байланысты. Мәселен, егемен кредиттік рейтингтің өзгеруі қазақстандық эмитенттердің, оның ішінде ҚМГ кредиттік рейтингтеріне әсер етуі мүмкін.

2021 жылы елеулі сыртқы экономикалық тәуекелдерге қарамастан, Fitch және S&P Компанияның бұрын белгіленген рейтингтерін растады. Қазіргі уақытта ҚМГ Moody's пен Fitch-тен, ал S&P-ден егеменді рейтингтен екі саты төмен инвестициялық деңгейдегі кредиттік рейтингтерге ие.

• 2021 жылғы 28 қаңтарда мұнай мен газды барлау, өндіру және өңдеу секторының тәуекелдерін бағалауды қайта қарағаннан кейін S&P рейтингтік агенттігі ҚМГ кредиттік рейтингтерін теріс болжаммен «ВВ» деңгейінде растады.
• 2021 жылғы 30 сәуірде S&P халықаралық рейтингтік агенттігі ҚМГ кредиттік рейтингін «BB» деңгейінде «теріс» болжаммен растады.
• 2021 жылғы 12 тамызда «Moody's» халықаралық рейтингтік агенттігі Қазақстанның егемен рейтингінің көтерілуіне байланысты ҚМГ кредиттік рейтингін «Baa3»-тен «Baa2»-ге дейін көтерді. Рейтинг бойынша болжам «жағымдыдан» «тұрақты» болып өзгерді.
• 2021 жылғы 20 қыркүйекте Fitch Ratings халықаралық рейтингтік агенттігі ҚМГ дефолтының ұзақ мерзімді рейтингін«BBB -» деңгейінде растады (егеменді рейтингтен бір тармақ төмен), болжам «тұрақты».
• 2021 жылғы 26 қарашада S&P рейтингтік агенттігі «ҚазТрансГаз» АҚ «Самұрық-Қазына» АҚ-ға тікелей берілгеннен кейін ҚМГ рейтингін «ВВ» деңгейінде растады, болжам «теріс»;
• 2021 жылғы 23 желтоқсанда Moody's рейтингтік агенттігі ҚМГ рейтингін Ваа2 деңгейінде растады, болжам «тұрақты».

ҚМГ рейтингтерінің динамикасы

Облигациялық қарыздар

2021 жылғы 31 желтоқсандағы жағдай бойынша ҚМГ-ның АҚШ долларымен қайта есептелген шоғырландырылған борышы 8 760 млн АҚШ долларын құрады, оның 6 250 млн АҚШ доллары (71%) облигациялық қарыздарға жатады (аудиттелмеген деректер).

ҚМГ компаниялар тобы жобаларының едәуір бөлігі өздерінің таза ақша ағындары есебінен қаржыландырылады. Бұл ретте, ҚМГ мен ЕТҰ жекелеген стратегиялық жобаларды қаржыландыру үшін немесе Компанияның қаржы стратегиясын іске асыру шеңберінде қаржылық орнықтылықты қолдау үшін қолайлы нарықтық жағдайларда облигациялар нарығына шыға алады.

ҚМГ ішкі және халықаралық капитал нарықтарында өзінің борышты басқарудың икемді және салмақты саясатына сәйкес қарыз алуды жүзеге асырады. Компанияның борыштық бағалы қағаздары Қазақстан эмитенттерінің арасындағы анағұрлым өтімді құралдардың бірі болып табылады. ҚМГ-ның шетел валютасындағы облигациялары тарихи түрде инвесторлардың кең ауқымын тартты. Инвесторлар базасы негізінен АҚШ, Еуропа және Азиядан мыңдаған институционалдық және бөлшек инвесторлардан тұрады. Еурооблигациялар Лондон қор биржасында, Қазақстан қор биржасында және AIX биржасында айналымда болады.

Толық ақпарат «Қаржылық шолу» бөлімінде берілген.

2021 жылғы 31 желтоқсандағы жағдай бойынша жалпы сомасы номиналы бойынша 6,25 млрд АҚШ доллары болатын Корпоративтік орталық деңгейінде еурооблигациялардың алты шығарылымы айналымда болды.

Инвесторлармен өзара іс-қимыл

ҚМГ қаржыландыру көздеріне тұрақты қолжетімділікті қамтамасыз ету және Компанияны қаржыландыру құнын төмендету мақсатында инвестициялық қоғамдастықпен өзара іс-қимылдың тиімді бағдарламасын іске асыруды жалғастыруда. Инвесторлармен өзара іс-қимыл процесіне Директорлар кеңесінің төрағасы, Басқарма төрағасы, Басқарманың мүшелері мен ҚМГ-ның стратегиялық, қаржылық және операциялық құрылымдық бөлімшелерінің басшылары, еңбек және қоршаған ортаны қорғау департаменті, сондай-ақ инвесторлармен жұмыс басқармасы тартылған.

ҚМГ әр тоқсан сайын инвесторлар үшін Басқарма төрағасы орынбасарының, Басқарма мүшелерінің және департамент директорларының қатысуымен қаржылық және операциялық қызмет нәтижелері бойынша конференц-қоңыраулар өткізеді. Бұдан басқа Компания инвесторлармен және рейтингтік агенттіктермен арнайы жеке конференц-қоңыраулар ұйымдастырды, сондай-ақ тұрақты дамудың жаһандық трендтері мен дамушы елдердегі нарықтық жағдай бойынша онлайн конференцияларға қатысты.

Компания инвестициялық қоғамдастық үшін ақпаратты ашу кезінде уақытылық, толықтық және қолжетімділік қағидаттарын ұстанады. ҚМГ тоқсан сайын тоқсандық нәтижелер бойынша презентацияны, қаржылық нәтижелер бойынша баспасөз хабарламасын, өндірістік нәтижелер бойынша баспасөз хабарламасын, ХҚЕС-ке сәйкес қаржы есептілігін, сондай-ақ деректері бар талдамалық анықтамалықтарды жариялайды. 2021 жылы Компания инвесторлар мен талдаушылардың ҚМГ-ның қаржылық және операциялық қызметі туралы сұратымдары бойынша ақпаратты жедел ұсыну практикасын жалғастырды.

Тұрақты даму қағидаттарын басшылыққа ала отырып, Компания 2021 жылы ESG бойынша ақпаратты ашудың ашықтығын айтарлықтай жақсартты. 2021 жылы ҚМГ 2020 жылға арналған тұрақты даму туралы ауқымды есеп жариялады. 2021 жылы көміртекті есептілік бойынша Климаттық бағдарламаның CDP алаңында 2020 жылдың қорытындылары бойынша климаттық сауалнама және су қауіпсіздігі бойынша сауалнама орналастырылды. 2021 жылдың қазанында Sustainalytics ҚМГ рейтингін 69-дан 72 баллға дейін көтерді. ESG тәуекелі рейтингінің деңгейі 34,5-тен 28,4 баллға дейін жақсарды, осылайша ҚМГ жоғары тәуекел диапазонынан тәуекелдің орташа деңгейінің диапазонына өтті, бұл ҚМГ-ның халықаралық мұнай-газ нарығында елеулі ESG-тәуекелдерін басқарудағы күшті позицияларын көрсетеді.

Материалдар мен жарияланымдар қолжетімді, сондай-ақ инвесторлармен жұмыс жөніндегі басқарма қызметкерлерімен байланысуға арналған байланыс ақпараты Компания сайтының «Инвесторлар» бөлімінде орналасқан.

ҚМГ екіжақты диалогтың тиімділігін одан әрі жақсартудың маңыздылығын түсінеді және кейіннен Директорлар кеңесі деңгейінде қаралатын Компанияның инвестициялық қоғамдастықтың қабылдауына талдау жүргізеді.